સુહાના સાથેની ફિલ્મના પ્રમોશનનો પ્રયાસ.
સંતોષ સિવાનને કેન્સમાં એવોર્ડના અભિનંદનનો વીડિયો પણ કિંગની સ્ક્રિપ્ટ સાથે રાખીને બનાવ્યો.
શાહરુખ ખાને તેની ‘અશોકા’ ફિલ્મના સર્જક સંતોષ સિવાનને કેન્સ ફિલ્મ ફેસ્ટિવલમાં મળેલા એવોર્ડના અભિનંદનનો વીડિયો બનાવતી વખતે પણ પોતાની આગામી ફિલ્મ ‘કિંગ’નો પ્રચાર કરી દીધો હતો. સિનેમેટોગ્રાફર તથા દિગ્દર્શક સંતોષ સિવાનને કેન્સમાં પિએર એન્જીન્યૂ એક્સલન્સ એવોર્ડ પ્રાપ્ત થયો છે. શાહરુખે તે માટે સિવાનને અભિનંદન આપતાં કહ્યું હતું કે પોતે સંતોષ પાસેથી ઘણું બધું શીખ્યો છે. જોકે, આવું કહેવા માટે પણ શાહરુખ તેની આગામી ફિલ્મ ‘કિંગ’ની સ્ક્રિપ્ટ લઈને બેઠો હતો. સ્ક્રિપ્ટ પર ફિલ્મનું ટાઈટલ સ્પષ્ટ રીતે જોઈ શકાય તે પ્રમાણે તેણે પોઝ આપ્યો હતો. બોલીવૂડ સમીક્ષકોએ કહ્યું હતું કે દેખીતી રીતે જ શાહરુખનો ઈરાદો સંતોષ સિવાનને અભિનંદન આપવા કરતાં પણ વધારે પોતાની ફિલ્મનો પ્રચાર કરવાનો છે.
શાહરુખ આ ફિલ્મ દીકરી સુહાના માટે બનાવી રહ્યો છે. ફિલ્મ ‘આર્ચીઝ’માં સુહાનાની બેકાર એક્ટિંગની બહુ ટીકા થઈ હતી. હવે તેનું સાટુ વાળવા શાહરુખ પોતાની અને સુહાનાની ભૂમિકા ધરાવતી ફિલ્મ પર ધ્યાન આપી રહ્યો છે.