ભારતમાં હવે હલકી ગુણવત્તાના ફૂટવેરનું વેચાણ નહીં થાય. ૧ જુલાઈ, ૨૦૨૩થી ભારતમાં નબળી ગુણવત્તાના ફૂટવેરના ઉત્પાદન અને વેચાણ પર પ્રતિબંધ મૂકવામાં આવશે. સરકારે ફૂટવેર એકમોને વર્લ્ડ ટ્રેડ ઓર્ગેનાઈઝેશનના ધારાધોરણોના પાલનમાં ગુણવત્તા નિયંત્રણ આદેશ લાગુ કરવા આદેશ આપ્યો છે. સરકારના આ આદેશ બાદ દેશમાં નબળી ગુણવત્તાના ફૂટવેરનું ઉત્પાદન અને વેચાણ બંને બંધ થઈ જશે.
સરકારે આ માટે ફૂટવેર કંપનીઓને સૂચનાઓ જારી કરી છે. સરકારે ફૂટવેર કંપનીઓ માટે ધોરણો રજૂ કર્યા છે. જેને અનુસરીને હવે તેમને ચંપલ-ચપ્પલ બનાવવા પડશે. ગુણવત્તા નિયંત્રણ આદેશના કાર્યક્ષેત્રમાં ૨૭ ફૂટવેર ઉત્પાદનોનો સમાવેશ કરવામાં આવ્યો છે. બાકીના ૨૭ ઉત્પાદનોને પણ આવતા વર્ષે આ કાર્યક્ષેત્ર હેઠળ લાવવામાં આવશે.
નવા નિયમમાં ફૂટવેર ઉત્પાદન માટે ટેસ્ટિંગ લેબોરેટરી, બીઆઈએસ લાઇસન્સ અને આઈએસઆઈ માર્કના નિયમોનું પાલન કરવું જરૂરી છે. સરકારે ૧લી જુલાઈથી તમામ ફૂટવેર કંપનીઓ માટે ગુણવત્તા નિયંત્રણ આદેશ ફરજિયાત બનાવ્યો છે. સરકારની નવી સૂચનાઓ બાદ દેશમાં નબળી ગુણવત્તાના જૂતા અને ચપ્પલ નહીં બને.
નવા નિયમ અંગે બ્યુરો ઓફ ઈન્ડિયન સ્ટાન્ડર્ડ્સે કહ્યું હતું કે હાલમાં ગુણવત્તાના ધોરણોના નિયમો મોટા અને મધ્યમ સ્તરના ઉત્પાદકો અને આયાતકારો પર લાગુ કરવામાં આવ્યા છે. બાદમાં, ૧ જાન્યુઆરી, ૨૦૨૪થી, નાના પાયાના ફૂટવેર ઉત્પાદકોએ પણ તેનું પાલન કરવું પડશે. ક્વોલિટી કંટ્રોલ ઓર્ડર માત્ર ફૂટવેર પ્રોડક્ટ્સની ગુણવત્તામાં સુધારો કરશે નહીં પરંતુ નબળા ઉત્પાદનોની આયાતને રોકવામાં પણ મદદ કરશે.
નોંધનીય છે કે લેધર અને ફૂટવેર સેક્ટરમાં સરકારે ૨૭ ઓક્ટોબર, ૨૦૨૦ના રોજ ત્રણ ફરજિયાત ગુણવત્તા નિયંત્રણ આદેશ જારી કર્યા હતા. તેનો એક આદેશ ગયા વર્ષે જાન્યુઆરીમાં લાગુ કરવામાં આવ્યો છે. હવે આ કંપનીઓએ ૧ જુલાઈથી બાકીના બે નવા ઓર્ડર સ્વીકારવાના રહેશે.નવા નિયમની મદદથી સરકાર ચીનથી આવતા નબળી ગુણવત્તાવાળા ફૂટવેર ઉત્પાદનો પર પ્રતિબંધ મૂકવા માંગે છે. જો ચીને ભારતમાં પોતાનો સામાન વેચવો હોય તો તેણે ધોરણનું પાલન કરવું પડશે.