યુટયૂબમાં સર્ચ અને કમેન્ટ્સ જોવાની પદ્ધતિ – બંને બદલાઈ રહ્યાં છે. શબ્દોમાં કહેવી મુશ્કેલ હોય એવી બાબતોને કેમેરાથી કેપ્ચર કરીને હવે તેના વિશે ઘણું જાણી શકાય.લેન્સની એ સુવિધા પહેલાં ફક્ત સ્માર્ટફોન પૂરતી સીમિત હતી, પછી તે ડેસ્કટોપ પર પહોંચી ને હવે યુટયુબમાં પણ આવી રહી છે.આ પ્રકારનાં સ્માર્ટ ફીચર્સ ઉપરાંત વિવિધ સર્વિસમાં એઆઈનો ઉપયોગ વધી રહ્યો છે – સારી અને ખરાબ, બંને રીતે.
લાંબા સમયથી કાગળ-પેન ભૂલાવા લાગ્યાં છે (છેલ્લે તમે ક્યારે કાગળ પર કંઈ, લાંબું લખ્યું હતું?!) તેમ કીપેડ પરનું ટાઇપિંગ ભૂલાવા લાગે એવા દિવસો પણ બહુ દૂર નથી. એક તરફ સિરી, ગૂગલ આસિસ્ટન્ટ, એલેક્સા વગેરે જેવાં વર્ચ્યુઅલ આસિસ્ટન્ટ કેસ્માર્ટ ડિવાઇસ આપણો પડ્યો બોલ ઝીલવા લાગ્યાં છે અને આપણે તેમના પર વોઇસ કમાન્ડથી જ કામ ચલાવીએ છીએ. બીજી તરફ કીબોર્ડમાં વોઇસ ટાઇમ ટાઇપિંગ ધીમે ધીમે વધી રહ્યું છે. ત્યાં હવે આંગળીનાં ટેરવાંને આંખો આવી છે! હવે આપણે કોઈ પણ અજાણી બાબત વિશે વધુ જાણવું હોય અથવા એવું કંઈ પણ જેને શબ્દોમાં ઢાળવું કે ટાઇપ કરવું લગભગ અશક્ય હોય તેને કેમેરાથી કેપ્ચર કરીને ઇન્ટરનેટ પર તે બાબત વિશે ઘણું વધુ જાણીશકીએ છીએ.લેન્સની આ સુવિધા હવે યુટ્યૂબમાં પણ આવી રહી છે. તેની સાથોસાથ એઆઇ સંબંધિત કેટલીક મહત્ત્વની વાતો પણ જાણીએ.
ઇમેજ બતાવીને વીડિયો શોધો
હમણાં આપણે ‘ટેકનોવર્લ્ડ’માં વાત કરી હતી કે યુટ્યૂબ મ્યુઝિક એપમાં, આપણા મનમાં રમતું કોઈ ગીત ફક્ત ગણગણીને તેને સર્ચ કરવાની સુવિધા ઉમેરાઈ છે. બરાબર આવી જ સુવિધા યુટ્યૂબ એપમાં પણ ઘણા લોકોને મળી રહી છે.
મતલબ કે યુટ્યૂબ એપ પર અત્યારે જોઇતા વીડિયો કે સોંગ સર્ચ કરવાના બે રસ્તા છે. પહેલા રસ્તા મુજબ, એપ ઓપન કરી ઉપર જમણી તરફ સર્ચ આઇકમ પર ક્લિક કરો અને સર્ચ પેજ ખૂલે તેમાં ઉપર સર્ચ બોક્સમાં, જે જોઇતું હોય તે ટાઇપ કરો. બીજા રસ્તા માટે, સર્ચ બોક્સની બાજુના માઇક્રોફોન પર ક્લિક કરો અને વોઇસથી સર્ચ કરો.
તમે જોશો તેમ માઇક્રોફોન પર ક્લિક કરતાં વળી બે વિકલ્પો મળે છે – વોઇસ અને સોંગ. વોઇસ ઓપ્શનમાં આપણે કોઈ પણ શબ્દો બોલીને તેને લગતા વીડિયો સર્ચ કરી શકીએ છીએ અને સોંગ ઓપ્શનમાં કોઈ પણ ગીત બીજા કોઈ ડિવાઇસમાં પ્લે કરીને, પોતે ગાઇને કે ફક્ત ગણગણીને પણ તેને સર્ચ કરી શકીએ છીએ.
આ બંને ઓપ્શન ઉપરાંત યુટ્યૂબની એન્ડ્રોઇડ એપમાં સર્ચનો ત્રીજો ઓપ્શન પણ ઉમેરાઈ રહ્યો છે – વિઝ્યુઅલ સર્ચ!
તમે જાણતા જ હશો કે જો કોઈ બાબત વિશે ક્યા શબ્દોમાં સર્ચ કરવું એ જ આપણે જાણતા ન હોઇએ તો તેના વિશે ગૂગલ ‘લેન્સ’ સર્વિસની મદદથી સર્ચ કરી શકાય છે. જેમ કે સામે દેખાતા કોઈ મજાના પંખી કે ફૂલનું નામ જાણવું હોય તો એ કઈ રીતે સર્ચ કરવું? આવી વાત શબ્દોમાં ગૂગલને પૂછી ના શકાય. આથી સ્માર્ટફોનમાં સર્ચ એપ ઓપન કરી, ગૂગલ લેન્સ પર ક્લિક કરી પંખી કે ફૂલનો ફોટોગ્રાફ લઇએ તો સર્ચ એન્જિન એ ફૂલ વિશેની પાર વગરની માહિતી શોધી આપે છે.
અગાઉ ફક્ત સ્માર્ટફોનની સર્ચ એપમાં આ સુવિધા હતી. હવે ડેસ્કટોપમાં પણ ઉમેરાઈ ગઈ છે. આથી ડેસ્કટોપમાં ગૂગલને કોઈ ફોટોગ્રાફ ‘સુંઘાડીને’ તેના વિશે વધુ માહિતી મેળવી શકાય છે.
ગૂગલ લેન્સની આ મજાની સુવિધા હવે યુટ્યૂબ એન્ડ્રોઇડ એપમાં પણ ઉમેરાઈ રહી છે. આ સુવિધા આપણી એપમાં ઉમેરાયા પછી સર્ચ આઇકન પર ક્લિક કરીશું ત્યારે સર્ચ બોક્સ અને માઇક્રોફોનની વચ્ચે ગૂગલ લેન્સનો આઇકન પણ જોવા મળશે. તેને ક્લિક કરી આપણે કોઈ બાબતનો ફોટોગ્રાફ લઇને તેના વિશેનો વીડિયો યુટ્યૂબ પર સર્ચ કરી શકીશું.
જેમ કે કોઈ ફિલ્મનું પોસ્ટર ગૂગલ લેન્સથી સ્કેન કરતાં, યુટ્યૂબ પર એ ફિલ્મને સંબંધિત વીડિયો શોધી શકાશે! લેન્સ ફીચરમાં ઓપ્ટિકલ કેરેકટર રેકગ્નિશન (ઓસીઆર) પણ સામેલ હોવાથી તેને કોઈ ટેકસ્ટ બતાવીશું તો તેને પણ પારખીને તેના વિશે યુટ્યૂબ પરનું કન્ટેન્ટ શોધી આપશે.
કમેન્ટ્સનો સારાંશ આપશે એઆઇ
છેલ્લા એકાદ વર્ષથી જો તમે તમારા ગૂગલ એકાઉન્ટમાં સર્ચ લેબ એક્સપરિમેન્ટ ઓન કરેલ હોય તો ગૂગલમાં કંઈ પણ સર્ચ કરતાં ઉપરના ભાગમાં આર્ટિફિશિયલ ઇન્ટેલિજન્સ (એઆઇ) દ્વારા જનરેટ થયેલ ઓવરવ્યૂ જોવા મળે છે. મતલબ કે આપણે જે કંઈ સર્ચ કરીએ તેના વિશે ગૂગલ સર્ચ વિવિધ વેબપેજિસ બતાવે એ પેજિસ ફેંદવા આપણે જવું પડે નહીં. ગૂગલ પોતે જ એ કસરત કરીને વિવિધ વેબપેજિસમાંથી આપણને જોઇતી માહિતી તારવી આપે.
આ સુવિધા પહેલાં ભારતમાં લોન્ચ થઈ. હવે તે યુએસમાં પણ લોન્ચ થઈ છે. ઘણા લોકો મજાક મસ્તીમાં ગૂગલની એઆઇ સિસ્ટમ ગૂંચવાય એવા સવાલો પૂછે છે. એ કારણે ગૂગલ ખરેખર ગૂંચવાય છે અને પછી તેના ગરબડ ગોટાળિયા જવાબો સોશિયલ મીડિયા પર શેર કરીને લોકો ગૂગલની એઆઇની મજાક ઉડાવે છે!
મૂળ મુદ્દો એ છે કે વિવિધ કંપનીની એઆઇ સિસ્ટમ તેને જે પાર વગરનો ડેટા મળે તેમાંથી આપણને ઉપયોગી થઈ શકે તેવો સારાંશ તારવી આપે છે. આ ટ્રેન્ડ સતત વિસ્તરી રહ્યો છે.
હમણાં એમેઝોન જેવી વેબસાઇટ પર તમે કંઈક શોપિંગ કરતા હો ત્યારે જે તે પ્રોડક્ટના પેજ પર પહોંચીને તેના વિશે યૂઝર્સના રિવ્યૂ જોવા જાઓ તો તેમાં પણ યૂઝર તરફથી મળેલા સંખ્યાબંધ રિવ્યૂઝનો સારાંશ તૈયાર કરીને સૌથી ઉપર બતાવવામાં આવે છે.
અમુક યૂઝરે પોતાના રિવ્યૂમાં પ્રોડક્ટની ક્વોલિટી, વેલ્યૂ ફોર મની વગેરે બાબતનાં વખાણ કર્યાં હોય, તો અમુક યૂઝરે ડિફેક્ટિવ પ્રોડક્ટ ડિલિવર થઈ હોવાની ફરિયાદ કરી હોય, એ બધા મુદ્દા તારવીને તૈયાર કરવામાં આવેલી, એઆઇ જનરેટેડ નાનકડી સમરી આપણને જોવા મળે છે. આથી આપણે બધા રિવ્યૂ વાંચવા જવું પડે નહીં.
આવી જ એઆઇ જનરેટેડ સમરી હવે યુટ્યૂબ પર પણ આવી રહી છે.
આવી સમરી ‘શોર્ટ્સ’ વીડિયો માટે જોવા મળશે. હાલમાં ફક્ત આઇઓએસ અને એન્ડ્રોઇડ માટેની યુટ્યૂબ એપમાં, માત્ર અમુક ક્રિએટર્સના શોર્ટ વીડિયોમાં આવી સમરી જોવા મળશે. એમાં પણ ખાસ કરીને જે શોર્ટ વીડિયો વિશે અનેક કમેન્ટ આવી હોય તેમાં કમેન્ટ્સની સમરી જોવા મળશે.
આ ફીચર જે તે વીડિયો વિશે પબ્લિશ થયેલી બધી કમેન્ટ્સ તપાસે છે, તેમાંથી અમુક ચોક્કસ કીવર્ડ શોધે છે અને જે કીવર્ડ વિશે વધુમાં વધુ ચર્ચા થઈ હોય તેવા દરેક ટોપિકનાં ટાઇટલ ક્રિએટ કરીને યૂઝરને બતાવે છે. શોર્ટ વીડિયોમાં આ ફીચર ટેસ્ટ કર્યા પછી તેનાં પરિણામોના આધારે લોંગ ફોર્મેટ વીડિયોમાં પણ આ ફીચર ઉમેરાઈ શકે છે.
અને હા, તમને લાંબા વીડિયો જોવા બહુ ગમતા ન હોય, તો એવા વીડિયોનો સારાંશ તૈયાર કરી આપતાં, થર્ડ-પાર્ટી એઆઇ-પાવર્ડ ટૂલ્સ પણ મળી આવશે!
વોટ્સએપ સ્ટેટસ પર હવે સહેલો કંટ્રોલ
વોટ્સએપની આઇઓએસ એપમાં લાંબા સમયથી સ્ટેટસને સંબંધિત ઉપલબ્ધ એક ફીચર હવે એન્ડ્રોઇડમાં પણ આવી રહ્યું છે. આ ફીચરને કારણે આપણે જ્યારે પણ એન્ડ્રોઇડમાં કોઈ સ્ટેટસ અપડેટ મૂકીએ ત્યારે એ જ સમયે તેનાં પ્રાઇવસી સેટિંગ્સ નક્કી કરી શકીશું.
એ મુજબ પોતાનું સ્ટેટસ પોસ્ટ કરતાં પહેલાં આપણને એક નાની વિન્ડો જોવા મળશે, જેમાં આપણે પોતે જે સ્ટેટસ અપડેટ કરવા જઇ રહ્યા છીએ તે જોવા મળશે અને તેની સાથોસાથ એ સ્ટેટસ કોણ જોઈ શકે એ પણ નક્કી કરી શકાશે. વોટ્સએપ આ માટે મુખ્ય બે વિકલ્પ આપશે – એક, ઓલ કોન્ટેક્ટ (તેમાંથી કોને બાકાત રાખવા તે આપણે નક્કી કરી શકીશું) અને બે, અમુક ચોક્કસ કોન્ટેક્ટ. આ બંને વિકલ્પ આખરે તો ફોનબુકમાંના અમુક કોન્ટેક્ટ સિલેક્ટ કરવા વિશેના છે.
આ નવા ફીચરનો અર્થ એ પણ થયો કે હવે આપણે વોટ્સએપમાં સેટિંગ્સમાં પ્રાઇવસીના પેજ પર જઇને સ્ટેટસની પ્રાઇવસી સંબંધિત પેજ પર ‘હૂ કેન સી માય સ્ટેટસ અપડેટ’ હેઠળ કોઈ એક વિકલ્પ પસંદ કરવાની ઝંઝટ રહેશે નહીં. આ કામ આપણે સ્ટેટસ પોસ્ટ કરતી વખતે સીધેસીધું, ત્યાં ને ત્યાં કરી શકીશું. હાલમાં આ ફીચર એન્ડ્રોઇડમાં વોટ્સએપના બીટા યૂઝર્સને ઉપલબ્ધ થઈ રહ્યું છે. થોડા સમયમાં તમામ યૂઝરને મળવા લાગશે.
પીસીના ફાઇલ એક્સ્પ્લોરરમાં મળશે ફોનની ફાઇલ્સ – કેબલ વિના
જો તમે તમારા સ્માર્ટફોન અને પર્સનલ કમ્પ્યૂટર બંનેનો ભરપૂર ઉપયોગ કરતા હશો તો ચોક્કસપણે એવું ઇચ્છતા હશો કે આ બંને ડિવાઇસ એકમેકની વધુ નજીક આવે. વાત ફક્ત ફિઝિકલ ડિસ્ટન્સ દૂર કરવાની નથી! બંને ડિવાઇસમાં જુદા જુદા પ્રકારના કન્ટેન્ટ અને ફાઇલ્સની આપલે એકદમ સહેલી થવી જોઇએ.
જો તમે એપલની ઇકો સિસ્ટમને સમર્પિત હો અને તમારી પાસે આઇફોન, આઇપેડ, મેકબુક વગેરે જેવાં ડિવાઇસ હોય તો તમારે ચિંતાની કોઈ વાત નથી. એપલ તમારું બધું કામ એકદમ સહેલું બનાવી આપે છે. તમે પોતાનાં બધાં ડિવાઇસમાંના કન્ટેન્ટની એકમેકમાં સહેલાઈથી આપલે કરી શકો છો.
પરંતુ જો તમારી પાસે એપલ સિવાયનાં ડિવાઇસ હોય તો વાત એટલી સહેલી રહેતી નથી.
આ સ્થિતિમાં, દુનિયાભરના મોટા ભાગના લોકોની જેમ તમારી પાસે એન્ડ્રોઇડનો સ્માર્ટફોન અને માઇક્રોસોફ્ટનું વિન્ડોઝ લેપટોપ હશે. બંને કંપની અલગ અલગ એટલે બંને વચ્ચે ખાસ દોસ્તી પણ નહીં. અલબત્ત બંને કંપની હવે જુદી જુદી રીતે આપણું કામ સહેલું બનાવવાના પ્રયાસ કરી રહી છે.
‘ટેકનોવર્લ્ડ’માં આપણે અગાઉ ‘નીયર બાય શેર’, ‘માઇક્રોસોફ્ટ માય ફોન લિંક’ અને ‘માઇક્રોસોફ્ટ ડ્રોપ’ જેવી સુવિધાઓની વિગતવાર વાત કરી છે, જેની મદદથી આપણે એન્ડ્રોઇડ સ્માર્ટફોન કે વિન્ડોઝ લેપટોપ વચ્ચે ફાઇલ્સની સહેલાઈથી આપલે કરી શકીએ છીએ.
હવે માઇક્રોસોફ્ટ કંપની આખી વાતને હજી વધુ સહેલી બનાવી રહી છે. એ માટે કંપની તેની ફોન લિંક એપને વિસ્તારી રહી છે.
એ મુજબ ફોન લિંક એપની મદદથી આપણે લેપટોપમાં ફાઇલ એક્સપ્લોરરમાં જ એન્ડ્રોઇડ ફોનની ફાઇલ્સ એક્સેસ કરી શકીશું.
અત્યારે જે રીતે આપણે ફોનને યુએસબી કેબલથી લેપટોપ સાથે કનેક્ટ કરીએ એ પછી લેપટોપમાં ફાઇલ એક્સપ્લોરરમાં એક ડ્રાઇવ તરીકે એન્ડ્રોઇડ ફોન કનેક્ટ થાય છે અને તેમાંની બધી ફાઇલ્સ જોઈ શકાય છે, બરાબર એ જ રીતે આ નવી પદ્ધતિમાં કામ થશે.
ફેર ફક્ત એટલો રહેશે કે આપણે બંને ડિવાઇસને કેબલની મદદ વિના કનેક્ટ કરી શકીશું.
આ ફીચર વિન્ડોઝ ૧૧માં આવી રહ્યું છે. અલબત્ત એ માટેની કોઈ નિશ્ચિત તારીખ હજી જાહેર થઈ નથી. તમામ યૂઝરને તેનો લાભ મળે તે પહેલાં વિન્ડોઝ ૧૧ના બિટા વર્ઝનમાં લોન્ચ થાય તેવી પણ પૂરી શક્યતા છે.
આપણા સુધી આ ફીચર પહોંચે પછી તેનો લાભ લેવા માટે લેપટોપમાં વિન્ડોઝના સેટિંગ્સમાં જવાનું રહેશે. તેમાં બ્લુટૂથ એન્ડ ડિવાઇસિસમાં મોબાઇલ ડિવાઇસિસ અને તેમાં મેનેજ મોબાઇલ ડિવાઇસિસમાં ‘શો મોબાઇલ ડિવાઇસ ઇન ફાઇલ એક્સપ્લોરર’ વિકલ્પ ઓન કરી શકાશે.
અત્યારે તમે જાણતા જ હશો કે ફોન લિંક એપની મદદથી ફોનમાંના ફોટો અને વીડિયો, નોટિફિકેશન્સ, એસએમએસ વગેરે લેપટોપ/પીસીના સ્ક્રીન પર જોઈ શકાય છે. તેની મદદથી લેપટોપ/પીસીમાંથી કોલિંગ પણ શક્ય બને છે. પરંતુ અન્ય પ્રકારની ફાઇલ્સની આપલે શક્ય બનતી નથી.
જો સ્માર્ટફોનમાંની બધી જ ફાઇલ્સ બ્લુટૂથની મદદથી, કેબલથી કનેક્ટ કર્યા વિના લેપટોપ/પીસીમાં ફાઇલ એક્સપ્લોરરમાં ઉપલબ્ધ થઈ જશે તો ખાસ કરીને બિઝી એક્ઝિક્યુટિવ્સ અને સ્માર્ટ સ્ટુડન્ટ્સનું કામ ઘણું સહેલું થઈ જશે.
આપણી પોસ્ટ, ફોટો, ડિઝાઈન વગેરેથી એઆઇ સિસ્ટમ્સ ટ્રેઇન થશે?
ઇન્ટરનેટ પર એક જાણીતી કહેવત છે કે ‘જો તમને કોઈ સર્વિસ મફત મળી રહી હોય તો તમે પોતે જ વેચાઈ રહેલી પ્રોડક્ટ છો!’ મતલબ કે આપણને મફત સર્વિસ આપવાના બદલામાં ટેક કંપનીઓ આપણા વિશે વધુ ને વધુ માહિતી એકઠી કરે છે અને એ માહિતી વેચીને તેમાંથી કમાણી કરે છે.
નવા સમયમાં આ કહેવત થોડો જુદો રંગ પકડી રહી છે. આપણને મફત સર્વિસ આપતી ટેક કંપનીઓ આપણા જ ડેટાનો ઉપયોગ પોતાના આર્ટિફિશિયલ ઇન્ટેલિજન્સ (ઓઆઇ) મોડેલ્સને ટ્રેઇન કરવા માટે કરી રહી છે.
ફેસબુક-ઇન્સ્ટાગ્રામ
આ મહિનામાં એટલે કે જૂન ૨૬થી મેટા કંપની પોતાની પ્રાઇવસી પોલિસી અપડેટ કરી રહી છે. એ પોલિસી અમલમાં આવી જશે એ પછી મેટા કંપની તેના ફેસબુક અને ઇન્સ્ટાગ્રામ પ્લેટફોર્મ્સના તમામ યૂઝરના ડેટાનો પોતાના એઆઇ ટૂલ્સને ટ્રેઇન અને ઇમ્પ્રૂવ કરવા માટે ઉપયોગ કરી શકશે.
આપણી પોસ્ટ, ફોટોઝ, કેપ્શન્સ, મેસેજિસ વગેરે બધી જ બાબતોનો મેટાના એઆઇ ચેટબોટને ટ્રેઇન કરવા માટે કંપની ઉપયોગ કરશે. આ વાત તમને ગમે કે ન ગમે, એ બાબતે આપણે કંઈ કરી શકીશું નહીં કેમ કે નવી પોલિસી અમલમાં આવશે તે પછી તેનો સ્વીકાર કર્યા પછી જ આપણે ઉપયોગમાં આગળ વધી શકીશું. જો કંપની સ્પષ્ટપણે મંજૂરી નહીં માગે તો આ બંને પ્લેટફોર્મનો ઉપયોગ કરવાનું આપણે ચાલુ રાખીશું તેને જ આપણી મંજૂરી માની લેવામાં આવશે.
અત્યારે એવું લાગે છે કે યુરોપિયન યુનિયન અને અમેરિકાના ફક્ત એક સ્ટેટ ઇલિનોઇસના યૂઝર્સ પોતાના ડેટાનો આ રીતે ઉપયોગ ન થાય તેવું સેટિંગ કરી શકશે. કારણ કે ત્યાંના કાયદા મુજબ યૂઝર્સને જનરલ ડેટા પ્રોટેકશન રેગ્યુલેશન (જીડીપીઆર) હેઠળ પ્રાઇવસીની વધુ મોકળાશ મળે છે.
એડોબ
ફેસબુક અને ઇન્સ્ટાગ્રામ પર તો કંપની આપણને બધુ મફત આપે છે એટલે બદલામાં તે આપણી પાસે કંઈક માગે છે એ સમજી શકાય તેવી વાત છે, પરંતુ એડોબ જેવી કંપની પણ કંઈક આ જ રસ્તે ચાલી રહી છે, જે પોતાની સર્વિસિસનો માત્ર પેઇડ સબસ્ક્રિપ્શન પર લાભ આપે છે.
કંપનીએ હમણાં તેની ટર્મ્સ ઓફ સર્વિસમાં ફેરફાર કર્યો છે, જેમાં કંપનીએ કહ્યું છે કે તેની સર્વિસિસ પરના યૂઝર્સના કન્ટેન્ટને કંપની ઓટોમેટેડ અથવા મેન્યુઅલ એમ બંને રીતે એક્સેસ કરી શકશે.
એ કારણે મોટા ભાગના લોકોએ માન્યું કે કંપની પોતાની સર્વિસ, સોફ્ટવેર અને યૂઝર એક્સપિરિયન્સને સુધારવા માટે મશીન લર્નિંગ જેવી ટેકનોલોજીની મદદથી યૂઝરના કન્ટેન્ટનું એનાલિસિસ કરશે. એડોબ કંપની પણ તેના યૂઝર્સના કન્ટેન્ટની મદદથી ‘ફાયરફ્લાય’ તરીકે ઓળખાતા એડોબના જનરેટિવ એઆઇ મોડેલને ટ્રેઇન કરી શકે છે.
દેખીતું છે કે કંપનીની પોલિસીમાં આ ફેરફાર સામે તેના યૂઝર્સે સખત વાંધો ઉઠાવવાનું શરૂ કર્યું છે.
જોકે કંપનીએ તરત ખુલાસો કરીને કહ્યું છે કે પોલિસીમાં ફેરફારનો મતલબ એ નથી કે કંપનીના કસ્ટમર્સના કન્ટેન્ટની મદદથી ફાયરફ્લાય ટ્રેઇન કરવામાં આવશે અને યૂઝર્સના કન્ટેન્ટને કંપની પોતાની માલિકીનું કન્ટેન્ટ ગણશે નહીં. આ ખુલાસા પછી પણ એડોબની વિવિધ સર્વિસના યૂઝર્સમાં ખાસ્સો કચવાટ છે.