અમેરિકાના પૂર્વ રાષ્ટ્રપતિ ડોનાલ્ડ ટ્રમ્પની ક્લાસિફાઈડ દસ્તાવેજો સાથે સંબંધિત ગુનાઈત કેસમાં ધરપકડ કરવામાં આવી હતી. ટ્રમ્પ આ મામલામાં મિયામી કોર્ટમાં હાજર થવા પહોંચ્યા હતા. જોકે સુનાવણી બાદ તેમને કોર્ટમાંથી બિનશરતી બહાર જવાની મંજૂરી આપવામાં આવી હતી.
ગોપનીય દસ્તાવેજોના કેસમાં દોષિત ન હોવાની કરી દલીલ
સુનાવણી દરમિયાન ટ્રમ્પે ફરી કોર્ટમાં કહ્યું કે તેઓ ગોપનીય દસ્તાવેજોના મામલામાં દોષિત નથી. ટ્રમ્પે ગુપ્ત દસ્તાવેજો સાથે કથિત ચેડા સંબંધિત 37 આરોપો માટે દોષિત ન હોવાની કબૂલાત કરી હતી. ટ્રમ્પના એટર્ની ટોડ બ્લેન્ચે ન્યાયાધીશને કહ્યું, “અમે ચોક્કસપણે દોષિત ન હોવાની દલીલ કરીએ છીએ.” આ પહેલા ટ્રમ્પ સુનાવણીનો સામનો કરવા બપોરે મિયામી પહોંચ્યા હતા અને કોર્ટમાં આત્મસમર્પણ કર્યું હતું. આ પછી કોર્ટમાં જ તેમની ધરપકડ કરવામાં આવી હતી.
જજે આ મામલે શું કહ્યું…
અહેવાલ અનુસાર સુનાવણી દરમિયાન મેજિસ્ટ્રેટ જજ જોનાથન ગુડમેને કહ્યું કે ટ્રમ્પ તેમના સહયોગી વોલ્ટ નૌટુ સાથે કેસ વિશે વાત કરી શકે નહીં. ન્યાયાધીશે પ્રોસિક્યુટર્સને સંભવિત સાક્ષીઓની સૂચિ તૈયાર કરવા પણ કહ્યું કે જેની સાથે ડોનાલ્ડ ટ્રમ્પ કેસના સંબંધમાં વાત કરી શકતા નથી. તે આ સાક્ષીઓ સાથે વકીલ દ્વારા જ વાતચીત કરી શકે છે. ન્યાયાધીશે પ્રતિવાદીઓ પર મુસાફરી પ્રતિબંધ લાદ્યો નથી.
અગાઉ પણ કોર્ટમાં હાજર થયા હતા
યુએસ જસ્ટિસ ડિપાર્ટમેન્ટે ભલામણ કરી હતી કે ટ્રમ્પ અને નોટુ બંનેને બોન્ડ અથવા ખાસ શરતો વિના મુક્ત કરવામાં આવે. સુનાવણી દરમિયાન સરકારી વકીલ ડેવિડ હરબેચે કહ્યું કે સરકારને ડર નથી કે આરોપીઓ કેસની સુનાવણીમાંથી ભાગી શકે છે. તાજેતરના મહિનાઓમાં ટ્રમ્પની આ બીજી કોર્ટમાં હાજરી હતી. આ પહેલા એપ્રિલમાં તે ન્યૂયોર્કની કોર્ટમાં હાજર થયા હતા. તેમના પર એક પોર્ન સ્ટારને ચૂપ રહેવા માટે મોટી રકમ આપવાનો આરોપ હતો. તે કેસમાં પણ ટ્રમ્પે કોર્ટમાં પોતાને નિર્દોષ ગણાવ્યા હતા. તમને જણાવી દઈએ કે ટ્રમ્પ અમેરિકાના પહેલા પૂર્વ રાષ્ટ્રપતિ છે જેઓ ફોજદારી કેસમાં ફેડરલ જજ સમક્ષ હાજર થયા છે