રાજકોટ સિવિલ હોસ્પિટલનો ડોક્ટર દારૂ પીને દર્દીઓની સારવાર કરતો ઝડપાયો

🔊 इस खबर को सुनें

najrana pathan

રાજકોટ સિવિલ હોસ્પિટલ ફરી એક વખત વિવાદમાં આવી છે અને આ વખતે તો હદ કરી નાખી હોય તેવું કૃત્ય હોસ્પિટલના ડોક્ટરનું સામે આવ્યું છે. સિવિલ હોસ્પિટલમાં આજ કામ કરતા ડોક્ટર હોસ્પિટલમાં જ દારૂ પીને દર્દીઓની સારવાર કરતા હોવાનું સામે આવ્યું છે. હોસ્પિટલના ઇમર્જન્સી રૂમમાં ફરજ બજાવતો ડો.સાહિલ ખોખર ફરજ દરમિયાન દારૂ ઢીંચતો હતો. અને નશાખોર હાલતમાં દર્દીઓની સારવાર કરતો હોવાનું સામે આવ્યું હતું, ત્યારબાદ જાગૃત નાગરિક દ્વારા પોલીસને સાથે રાખી ડો.ખોખરને તેની ડ્યૂટી દરમિયાન દારૂ પીધેલી હાલતમાં ઝડપી લીધો હતો, ડોક્ટર રૂમમાં કબાટના ખાનામાંથી દારૂનો જથ્થો પણ મળી આવતા તબીબનો ભાંડો ફૂટી ગયો હતો.

કબાટમાંથી દારુની બોટલ મળી
ક્રાઇમ બ્રાંચની ટીમ દ્વારા ડો.સાહિલ ખોખર ઇમરજન્સી રૂમની બહાર કાચની કેબિનમાં એક નર્સ સાથે બેઠો હતો, ડો.ખોખરને ક્રાઇમ બ્રાંચની ટીમે પોતાની ઓળખ આપી તેનું માસ્ક હટાવતાં જ ડોક્ટર ખોખર નશાખોર હાલતમાં હોવાની શંકા દૃઢ બની હતી, અને ડો.સાહિલ ખોખરને કેસબારીની સામે આવેલા ડોક્ટર રૂમમાં લઇ જવાયો હતો, જ્યાં લાકડાંના કબાટમાં તેનું ખાનું ખોલાવતાં જ પાણીની બોટલમાં દારૂ ભરેલો મળ્યો હતો.

ક્રાઈમબ્રાન્ચે ધરપકડ કરી કાર્યવાહી હાથ ધરી
ડો.ખોખર ચારેક વર્ષથી રાજકોટ સિવિલ હોસ્પિટલમાં કરારી ડોક્ટર તરીકે ફરજ બજાવતો હોવાનું સામે આવ્યું છે, ડો.ખોખર જ્યારે પણ ફરજ પર હોય ત્યારે ડોક્ટર રૂમમાં જઇને દારૂના ઘૂંટડા મારી ફરી ઇમર્જન્સી રૂમમાં આવી જતો હતો. અને નશો કરેલો હોય ત્યારે પણ મહિલા દર્દી આવે તો તેને તપાસતો હતો. મહત્વની વાત એ છે કે સૌરાષ્ટ્રની સૌથી મોટી સિવિલ હોસ્પિટલમાં ક્યાં ક્યાંથી દર્દીઓ સારવાર માટે આવતા હોય છે. ત્યારે સિવિલ હોસ્પિટલમાં ક્યાંથી દારૂ આવ્યો અને કેટલા સમયથી દારૂ પીધો તે એક મહત્વનો સવાલ બને રહે છે. હાલ ક્રાઈમબ્રાન્ચ દ્વારા ડોક્ટરની ધરપકડ કરી છે. અને આગળની કાર્યવાહી હાથ ધરી છે.