ઓવૈસીએ આખરે શા માટે કહ્યું કે નરેન્દ્ર મોદીને ક્રેડિટ આપવી પડશે, રાહુલ ગાંધીને કહ્યા બાબા

ગુજરાત વિધાનસભાની ચૂંટણીમાં ભાજપે 156 બેઠકો સાથે જીત મેળવી હતી અને કોંગ્રેસ માત્ર 17 બેઠકો પર સમેટાઈ હતી. આમ આદમી પાર્ટીએ પાંચ બેઠકો જીતી અને લગભગ 13 ટકા વોટ શેર સાથે ત્રીજી સૌથી મોટી પાર્ટી બની. આ વખતે ચૂંટણીમાં AIMIM પણ હરણફાળ ભરી રહ્યું હતું, પરંતુ પાર્ટી એક પણ સીટ જીતવામાં સફળ રહી શકી નથી.

હવે ચૂંટણી પૂરી થયા પછી પણ AIMIM ચીફ અસદુદ્દીન ઓવૈસી રાજનીતિથી હટતા નથી. તેઓ હજુ પણ ભાજપ અને કોંગ્રેસ પર પ્રહારો કરી રહ્યા છે. જો કે, આ વખતે તેમણે વડાપ્રધાન નરેન્દ્ર મોદીને એક વાતનો શ્રેય આપવાની વાત કહી છે. ઓવૈસીએ પૂછ્યું કે આઝમ ખાન કેમ હાર્યા, અખિલેશની પત્ની ડિમ્પલ કેમ જીતી? આરએલડી ઉમેદવાર કેમ જીત્યા? અમે લડ્યા નથી, અમને શું?

ઓવૈસીએ કહ્યું કે આનો શ્રેય નરેન્દ્ર મોદીને આપવો પડશે કારણ કે તેમણે હિંદુઓની દુઃખતી રગ પકડી છે. આ વાત લોકો સમજી શકતા નથી.

‘આ આપણે સમજવાની જરૂર છે’

ઓવૈસી અહીં જ અટક્યા નહીં. તેમણે વધુમાં કહ્યું હતું કે, “મુસ્લિમોને આ સપનું બતાવવામાં આવે છે કે તમે તેમને હરાવી શકશો. મોરબીમાં 140 લોકોના મોત થયા, પરંતુ ભાજપ જીતી ગયો… બિલકિસ બાનોના બળાત્કારીને સંસ્કારી કહેવાયો, તેની જીત થઈ… આ વસ્તુ આપણે સમજવાની જરૂર છે, આજે નહીં તો કાલે ચોક્કસ સમજી જઈશું.”

કોંગ્રેસ અને રાહુલ ગાંધી પર નિશાન સાધ્યું

અસદુદ્દીન ઓવૈસીએ કોંગ્રેસ પાર્ટી અને રાહુલ ગાંધી પર પણ નિશાન સાધ્યું હતું. તેમણે કહ્યું કે મુસ્લિમ સમુદાયે કોંગ્રેસ સાથેનો રોમાંસ અથવા પ્રેમ સમાપ્ત કરવો જોઈએ, કારણ કે તે ભાજપને હરાવી શકશે નહીં. જ્યારે તેમને પૂછવામાં આવ્યું કે મુસ્લિમોનો રોમાંસ તમારાથી કેમ શરૂ ન થઈ શક્યો? આના પર ઓવૈસીએ કહ્યું કે “મારો પણ એકતરફી પ્રેમ છે. જે મુસ્લિમો કોંગ્રેસ સાથે પ્રેમમાં છે તેઓ ખોટું કરી રહ્યા છે. તેઓ વિચારે છે કે તેમને ત્યાંથી કંઈક મળશે, પરંતુ તેમને કંઈ નહીં મળે. મુસ્લિમોના મનમાં એ વાત નાખી દેવામાં આવી છે કે કોંગ્રેસ ભાજપને હરાવી શકે છે.”

ઓવૈસીએ રાહુલને કહ્યું ‘બાબા’

કોંગ્રેસ પર નિશાન સાધતા AIMIM ચીફ ઓવૈસીએ કહ્યું કે કોંગ્રેસ ગુજરાતમાં શું કરી રહી હતી? તેમણે વધુમાં કહ્યું કે, “તમારા નેતા પગપાળા ભારતભરમાં ફરે છે, શું તેના પર પણ અમારી જવાબદારી નક્કી થશે? બાબા બનીને ફરે છે. કોઈએ સારું કહ્યું છે કે તેમને હિમાચલમાં આમંત્રણ ન આપવું જોઈએ, નહીં ત્યાં પણ તેઓ હારી ગયા હોત.”

ગુજરાતની ચૂંટણીમાં AIMIMનું શું થયું?

ગુજરાતમાં AIMIMએ 13 બેઠકો પર વિધાનસભા ચૂંટણી લડી હતી. પાર્ટી એક પણ સીટ જીતી શકી નથી. સ્થિતિ એવી બની કે AIMIM ને NOTA કરતા ઓછા વોટ મળ્યા. ચૂંટણી પંચના આંકડા મુજબ, AIMIMને ગુજરાતમાં 0.29 ટકા વોટ મળ્યા છે, જ્યારે NOTAને 1.57 ટકા વોટ મળ્યા છે. બીજી તરફ કોંગ્રેસે એવો પણ આરોપ લગાવ્યો છે કે AIMIMએ ચૂંટણીમાં ભાજપને ફાયદો કરાવ્યો છે. આના પર ઓવૈસીએ કહ્યું, “જાન પ્યારી ભી નહીં જાન સે જાતે ભી નહીં… ઈલ્ઝામ લગાના ઇનકા કામ હૈ.”