દેવાયત ખવડની દાદાગીરી યુવકના હાથ-પગ ભાંગી નાંખ્યા, ઘટના CCTVમાં કેદ

🔊 इस खबर को सुनें

Bhargav Joshi

ગુજરાતના લોકગાયક દેવાયત ખવડ એક વખત ફરીથી વિવાદમાં સપડાયા છે. હકીકતમાં દેવાયત ખવડે રાજકોટના સર્વેશ્વર ચોક નજીક મયુરસિંહ રાણા નામના યુવક પર જીવલેણ હુમલો કર્યો હોવાનો કિસ્સો પ્રકાશમાં આવ્યું છે. જેમાં દેવાયત ખવડ સહિત બે શખ્સોએ મયુરસિંહ પર હુમલો કરીને તેના હાથ-પગ ભાંગી નાંખ્યા હતા. આ ઘટના CCTVમાં પણ કેદ થઈ ગઈ હતી.

CCTVમાં જોઈ શકાય છે કે, સર્વેશ્વર ચોક નજીક પુષ્કર એપાર્ટમેન્ટ પાસે મયુરસિંહ પસાર થઈ રહ્યો છે. આ દરમિયાન એક સફેદ કલરની કાર ત્યાં આવીને ઉભી રહે છે. જેમાંથી બે શખ્સો લાકડીના દંડા લઈને ઉતરે છે અને મયુરસિંહ પર તૂટી પડે છે.

આ હુમલાને પગલે ઘટના સ્થળે સ્થાનિકોના ટોળા ઉમટી પડ્યા હતા. આ બાબતની જાણ થતાં એ-ડિવિઝન પોલીસ સ્ટેશનનો કાફલો પણ ઘટના સ્થળે દોડી આવ્યો હતો. હાલ તો પોલીસે ઈજાગ્રસ્ત મયુરસિંહ રાણાને ગંભીર હાલતમાં સારવાર અર્થે રાજકોટની સિવિલમાં ખસેડ્યો છે.

શું છે સમગ્ર મામલો?
પોલીસની પ્રાથમિક તપાસમાં સામે આવ્યું છે કે, અગાઉ મયુરસિંહે દેવાયત ખવડ વિરૂદ્ધ અરજી કરી હતી. જ્યારે લંડન ખાતે રહેતા એક NRIએ ફેસબુક ઉપર લાઈવ કરી દેવાયત ખવડને બેફામ ગાળો ભાંડી હતી, જેના પગલે દેવાયત ખવડે પણ પોલીસમાં અરજી કરી હતી.

આ સિવાય રવિરત્ન પાર્કમાં દેવાયતના ઘર પાસે અગાઉ થયેલી માથાકૂટ વખતે પણ મયુરસિંહ રાણા ત્યાં હાજર હોય આ બાબતે પણ બન્ને વચ્ચે ડખ્ખો ચાલતો હતો. જેના પગલે આજે બપોરે મયુરસિંહની ઓફિસે ઘસી જઈ દેવાયત ખવડ સહિત બે શખ્સોએ તેની ઉપર ધોકા વડે હિંચકારો હુમલો કરી દીધો હતો.

હાલ તો CCTV ફૂટેજના આધારે તપાસ હાથ ધરી આરોપીઓની ધરપકડ માટે તપાસના ચક્રો ગતિમાન કર્યાં છે. જ્યારે પરિસ્થિતિ વધારે તંગ ના બને તે માટે ચુસ્ત બંદોબસ્ત ગોઠવી દીધો છે.