ભારતીય વાયુસેના ટ્રાન્સપોર્ટ એરક્રાફ્ટ AN-32ની જગ્યાએ હવે C-295 એરક્રાફ્ટ

🔊 इस खबर को सुनें

najrana pathan

ભારતીય વાયુસેના (IAF)ના ટ્રાન્સપોર્ટ એરક્રાફ્ટ AN-32ની જગ્યા હવે C-295 એરક્રાફ્ટ લેશે. આ એરક્રાફ્ટ ભારતમાં જ બનાવવામાં આવી રહ્યા છે. વાયુસેનાના એક અધિકારીએ જણાવ્યું કે ભારતીય વાયુસેના તેના પરિવહન કાફલાને આધુનિક બનાવવાની તૈયારી કરી રહી છે, જે અંતર્ગત આ મહત્વપૂર્ણ ફેરફાર પર વિચાર કરવામાં આવી રહ્યો છે.

અધિકારીના જણાવ્યા અનુસાર, C-295 મીડિયમ ટ્રાન્સપોર્ટ એરક્રાફ્ટ ભારતમાં ટાટા એડવાન્સ્ડ સિસ્ટમ્સ લિમિટેડ (TASL) અને યુરોપિયન ફર્મ એરબસ ડિફેન્સ એન્ડ સ્પેસ દ્વારા બનાવવામાં આવશે. આ પગલાને 1960ના દાયકામાં આઈએએફના પરિવહન કાફલામાં સામેલ કરાયેલા એવરો-748 એરક્રાફ્ટના રિપ્લેસમેન્ટ તરીકે પણ જોવામાં આવી રહ્યું છે. સાથે જ અધિકારીઓનું એમ પણ કહેવું છે કે AN-32ની જગ્યાએ C-295 એરક્રાફ્ટ પર સહમતિ બનાવવામાં આવી રહી છે.

ભારતીય વાયુસેના હાલમાં 90 AN-32 એરક્રાફ્ટ ચલાવે છે. આ વિમાન લદ્દાખ અને પૂર્વોત્તર સહિત દેશના ઘણા ભાગોમાં તૈનાત સૈનિકોની મદદ કરવામાં મહત્વપૂર્ણ ભૂમિકા ભજવી રહ્યા છે. એરફોર્સના અન્ય એક અધિકારીએ નામ જાહેર ન કરવાની શરતે જણાવ્યું હતું કે C-295 એરક્રાફ્ટ AN-32ની ભૂમિકા નિભાવવામાં સક્ષમ છે અને તે વધુ સારું રિપ્લેસમેન્ટ સાબિત થઈ શકે છે.