ચૂંટણીમાં ‘ગાળો’ પર ગરમાયું રાજકારણ, હવે ખડગેએ પીએમ મોદી વિશે કહી દીધી આવી વાત

કોંગ્રેસ અધ્યક્ષ મલ્લિકાર્જુન ખડગેએ ગુરુવારે પીએમ નરેન્દ્ર મોદી પર નિશાન સાધતા કહ્યું કે તેઓ કોંગ્રેસ અને તેના વરિષ્ઠ નેતાઓને ચાર ક્વિન્ટલ ગાળો આપે છે. મોદી કહે છે કે કોંગ્રેસ અને વિપક્ષો તેમને બે કિલો ગાળો આપે છે. પરંતુ તમે (મોદી) કોંગ્રેસને ગાળો આપ્યા વિના તમારું ભોજન પચાવી શકતા નથી. તમે ચાર ક્વિન્ટલ (400 કિગ્રા) ગાળો આપો છો. ક્યારેક મને, ક્યારેક રાહુલ ગાંધીને તો ક્યારેક સોનિયા ગાંધીને, પણ અમે કશું બોલતા નથી.

ગુજરાતમાં મોદીની વારંવારની ચૂંટણી રેલીઓ વિશે વાત કરતા કોંગ્રેસ અધ્યક્ષે કહ્યું, ‘આ એક મહત્ત્વપૂર્ણ ચૂંટણી છે કારણ કે પીએમ પોતે રસ્તાઓ અને ગામડાઓમાં ફરે છે અને દેખાડી રહ્યા છે કે તેઓને ચિંતા છે. મને સમજાતું નથી કેમ?’ ખડગેએ વધુમાં કહ્યું, ‘મોદી એવું નથી કહેતા કે વિકાસને મત આપો, તેમની વિચારધારાને મત આપો કે ઉમેદવારોને મત આપો. વિધાનસભાની ચૂંટણી હોય કે લોકસભાની ચૂંટણી, મોદી દરેક ચૂંટણીમાં ‘તેમને’ વોટ આપવાની વાત કરતા રહે છે. પરંતુ લોકોએ તમને (મોદી)ને ઘણી વખત મત આપ્યા છે. તે ‘મેં આ બનાવ્યું’ કે ‘મેં તે બનાવ્યું’નું રટણ કરતા રહે છે.

એવો પ્રશ્ન પૂછતાં ખડગેએ કહ્યું, ‘તેઓ (મોદી) પૂછતા રહે છે કે કોંગ્રેસે 70 વર્ષમાં શું કર્યું? હું કહું છું કે જો 70 વર્ષમાં લોકશાહી કે બંધારણ ન હોત તો તમે પીએમ ન બની શક્યા હોત. આ અમારું (કોંગ્રેસનું) યોગદાન છે. મોદી કહેતા રહે છે કે તેમનું અપમાન થયું છે અને તેઓ ગરીબ છે. જો તમારી આ હાલત છે તો દલિતો, ગરીબો અને આદિવાસીઓની શું હાલત છે? તેઓ (PM) કેટલી વાર સહાનુભૂતિ ઈચ્છે છે?’

ખડગેએ રેલવે સ્ટેશન અને એરપોર્ટ જેવી માળખાકીય સુવિધાઓના ખાનગીકરણ માટે પણ ભાજપ પર જોરદાર નિશાન સાધ્યું છે. તેમણે કહ્યું, ‘અમે જે પણ બનાવ્યું છે, તેઓ (ભાજપ) વેચી રહ્યા છે.’