એફ.એસ.ટી.ની ટીમે મધરાત્રે વાહન ચેકીંગમાં રૂપિયાની હેરાફેરી કરતી કાર પકડી

🔊 इस खबर को सुनें

Bhargav Joshi

શહેરના ટોપ-3 સર્કલ પાસેથી મધરાત્રિના સમયે રોકડ રકમની હેરાફેરી કરતી કાર ઝડપાઈ હતી. આ રકમ કયાંથી આવી અને કોના માટે લવાઈ હતી ? તે સહિતની બાબતે તપાસ આગળ વધારવામાં આવી છે.

વિધાનસભા સામાન્ય ચૂંટણી-2022 અંતર્ગત ગેરકાયદે રીતે રોકડ રકમની હેરાફેરી, આચાર સંહિતા ભંગના થાય તેની તકેદારીના ભાગરૂપે શહેરનાં પ્રવેશદ્વારો સમા નારી ચોકડી, ટોપ-થ્રી સર્કલ સહિત અનેક સ્થળે વાહનોની તપાસ કરવામાં આવી રહી છે. દરમિયાનમાં 104 ભાવનગર પૂર્વની એફએસટી ટીમ મધરાત્રિના 2-30 કલાકે ચેકીંગમાં હતી. ત્યારે એક શખ્સ કાર લઈ નીકળતા તેને શંકાના આધારે રોકી તલાશી લેતા કારમાંથી રોકડ રૂા.10 લાખ મળી આવ્યા હતા. જેથી એફએસસીની ટીમે રોકડ રકમ સહિતનો મુદ્દામાલ સ્થાનિક ભરતનગર પોલીસને સોંપ્યો હતો. આ અંગે આગળની તપાસ હાથ ધરવામાં આવી છે.

અત્રે ઉલ્લેખનીય છે કે આચાર સંહિતા અમલી હોઈ ગેરકાયદેસર હેરાફેરી, મોટા બેન્ક વ્યવહાર વગેરે પર તકેદારીના ભાગરૂપે ચાંપતી

નજર રખાઇ રહી છે, ત્યારે આચાર સંહિતા અમલી બની ત્યારથી પોલીસ, ઇન્કમટેક્સ વિભાગ સહિતની ટીમો દ્વારા

ભાવનગરમાં પ્રવેશતા વાહનોની તપાસ કરવામાં આવી રહી છે. હજુ પણ આગામી દિવસોમાં ભાવનગર શહેર અને ગ્રામ્ય વિસ્તારોમાં ચેકિંગ માટે વધુ ટીમો કાર્યરત કરી સઘન તપાસ હાથ ધરવામાં આવશે તેમ જણાવાયું છે.