પશ્ચિમ બંગાળના સીઆઇડી અધિકારીની ધરપકડ

🔊 इस खबर को सुनें

Bhargav Joshi

પશ્ચિમ બંગાળ પોલીસના સીઆઇડી ઓફિસર સહિત ચાર જણની મુંબઇ પોલીસે ધરપકડ કરી છે. કોલાબાના વિવાદાસ્પદ બિઝનેસમેન જીતુ નવલાનીની પાસેથી પૈસા પડાવવાના આરોપસર કાર્યવાહી કરવામાં આવી હતી. પોલીસે ચાર આરોપી સામે કેસ નોંધી વધુ તપાસ આદરી છે.

દક્ષિણ મુંબઇમાં પબ ચલાવતા જીતેન્દ્ર ચંદુલાલ નવલાની ઉર્ફે જીતુ (ઉં.વ.૪૯) મુંબઇના ભૂતપૂર્વ પોલીસ કમિશનર પરમબીર સિંહના નજીકના સાથીદાર હોવાનું કહેવાય છે. કોલકાતાના સીઆઇડી અધિકારીએ નવલાની, તેની પત્ની અને કુટુંબીજનોને ખોટા કેસમાં ફસાવવાની ધમકી આપી હતી. પોલીસમાં નોંધાવેલી ફરિયાદમાં નવલાનીએ આ બાબતનો ઉલ્લેખ કર્યો છે.

આરોપીએ નવલાની અને તેની પત્નીને મારી નાખવાની ધમકી આપી ૧૦ કરોડ રૃપિયાની ખંડણી માગી હતી. આરોપીઓ નવલાની પાસેથી ૨૦ લાખ  રૃપિયા વસૂલ કરવામાં સફળ થયા હતા એવો દાવો નવલાનીએ પોલીસ ફરિયાદમાં જણાવ્યું હતું.

આ કથિત ખંડણીની ઘટના ગત મે અને નવેમ્બર દરમિયાન બની હતી. પોલીસ સૂત્રોએ જણાવ્યું હતું કે ફરિયાદી અને આરોપી વચ્ચે વરલીની એક રેસ્ટોરન્ટમાં મીટિંગ થઇ હતી.

વરલી પોલીસે પશ્ચિમ બંગાળ પોલીસના સીઆઇડી અધિકારી રાજર્ષી બેનર્જી, અન્ય બે અધિકારી સુમિત બેનર્જી, સુદીપ દાસગુપ્તા અને અન્ય સામે કલમ ૩૮૪, ૩૮૬, ૧૨૦ બી હેઠળ ગુનો નોંધ્યો હતો.

આ કેસની તપાસ ચાલી રહી છે અને નવલાની દ્વારા કરાયેલા આરોપોની વરલી પોલીસ દ્વારા ચકાસણી કરવામાં આવી રહી છે.