ચૂંટણી ટાણે જ લગ્નોના પગલે રાજકીય પક્ષો અને નેતાઓ ટેન્શનમાં

🔊 इस खबर को सुनें

Bhargav Joshi

ઉમેદવારોની જાહેરાત બાદ વડોદરામાં જામી રહેલા ચૂંટણી પ્રચાર વચ્ચે નેતાઓ અને રાજકીય પક્ષોને ચૂંટણી ટાણે જ લગ્નસરાની સિઝનનું પણ ટેન્શન છે. કારણ કે આ વખતે વડોદરામાં 5000થી 6000 લગ્નો લેવાશે અને આ પૈકી વડોદરામાં 4000 લગ્ન તો ચૂંટણી માટે મતદાન થવાનું છે તેના એક સપ્તાહના સમયગાળામાં જ છે.

જાણવા મળતી વિગતો અનુસાર 12 નવેમ્બરથી લગ્નસરાની સિઝનનો પ્રારંભ થઈ રહ્યો છે. કેટરિંગ, ફરાસખાના અને પાર્ટી પ્લોટ સાથે સંકળાયેલા વેપારીઓના કહેવા પ્રમાણે બે વર્ષ બાદ કોઈ પણ જાતના કોરોનાના નિયંત્રણ વગર લગ્નો યોજાવાના હોવાથી આ વખતે લગ્નોનું આયોજન પણ વધારે છે.

વડોદરા અને તેની આસપાસ 1000 જેટલા પાર્ટી પ્લોટ છે અને આ તમામ પાર્ટી પ્લોટ 25 નવેમ્બરથી 5 ડિસેમ્બર સુધીના મોટાભાગના દિવસોમાં બૂક થઈ ચુક્યા છે. આ સિવાય હોટલોમાં અને અતિથિ ગૃહોમાં થયેલા બૂકિંગ તો અલગ.

વેપારીઓના કહેવા અનુસાર આ વખતે યોજાનાર લગ્નો પૈકી 80 ટકા લગ્નો એવા છે જેમાં આમંત્રિતોની સંખ્યા 500થી 800ની વચ્ચે છે. જ્યારે 10 ટકા લગ્નોમાં 1000થી 1500 જેટલા આમંત્રિતો હશે. સાથે સાથે લગ્નના આયોજન સાથે સંકળાયેલા લોકો માટે પણ મતદાન કરવું મુશ્કેલ બનશે.

કારણ કે એક લગ્ન પાછળ સરેરાશ 60થી 100 લોકોનો સ્ટાફ કામ કરતો હોય છે. જો આમંત્રિતોની સંખ્યા વધારે હોય તો આ સંખ્યા 150 સુધી પણ પહોંચી શકે છે. આમ લગ્નમાં વ્યસ્ત રહેનારા લોકોની સંખ્યા વધારે હશે તો તેની અસર મતદાન પર ચોક્કસ પડશે.