મતદાન અને તંત્ર: ૩૦ દિવસની મહેનત એક દિવસ માટે, જાણો ખાસ અહેવાલ

ચૂંટણી ધમાલમાં એક એક મતદારોને મળવાની અને ચૂંટણી પરિણામોના કયાસ કાઢવાની મન્સા સાથે પત્રકાર સર્વત્ર વિચરતા હોય છે, એવા જ એક વિચરણમાં આ હકીકત એબીટુના કેમેરામાં કેદ થઈ ગઈ. ભાણવડ થી પોરબંદર જતી આ ટીમે તેનો પ્રવાસ સાંજે ૧૭:૪૫ સે ભાણવડથી શરૂ કર્યો.

શહેરથી ત્રણ કિલોમીટર દૂર ખંભાળિયા પાટિયા પાસે સિ-વિજિલની ટીમે ગાડી થોભાવી, ડ્રાઇવર ને ડેકી ખોલવા અને અંદર બેઠેલાઓને બહાર આવવાનો પ્રેમાળ આદેશ થયો, ચેક કરનાર પોલીસ જવાનો અને સ્થળ પર ફ્લાઇંગ સ્કવોડના લીડર ભરત સિંહ સોલંકી કે જેઓ જિલ્લા કલેકટર અને ચૂંટણી અધિકારી એમ. એ. પંડ્યા, ચૂંટણી ખર્ચ નોડલ ઓફિસર અને જિલ્લા વિકાસ અધિકારી ધાનાણી તથા દેવભૂમિ દ્વારકા જિલ્લાના ચૂંટણી ઓબ્ઝર્વર સૌરભ દુબેના માર્ગદર્શન હેઠળ આ કામગીરી કરાવી રહ્યા હતા, ત્યાંથી આગળ ચાલતા ગળુંમા પણ આજ પ્રક્રિયામાંથી પત્રકાર ટીમ પસાર થઈ, આગળ જતાં કાટવાણામા આ કામગીરી પોરબંદર ચૂંટણી ઓબ્ઝર્વર અમિતાભ શાહ, જિલ્લા કલેકટર અને ચૂંટણી અધિકારી અશોક શર્મા તેમજ ચૂંટણી ખર્ચ નોડલ ઓફિસર અને જિલ્લા વિકાસ અધિકારી નિનામાના માર્ગદર્શન હેઠળ ચાલતી જોવા મળી.

ટીમ જયારે પોરબંદરમાં પ્રવેશી ત્યારે સાડા સાત વાગ્યાનો સમય થયો હતો અને ટીમે પોરબંદર જિલ્લા સેવાસદન -૧ માં પ્રવેશ કર્યો, ભોંયતળિયે મદદનીશ ચૂંટણી અધિકારી રાહુલ ડોડીયા અને નાયબ મામલતદાર વરુભાઈ, સાલ્વીભાઈ સહિતની ટીમ ચૂંટણી કામગીરીમાં વ્યસ્ત જોવા મળી,

પહેલા માળે જિલ્લા ચૂંટણી અધિકારી અને જિલ્લા કલેકટર અશોક શર્મા, બીજા માળે આસીસ્ટન્ટ રિટર્નીંગ ઓફિસર અને પ્રાંત અધિકારી કે. જે. જાડેજા, નાયબ ચૂંટણી અધિકારી અને ડેપ્યુટી કલેકટર હેતલ જોશી, મામલતદાર હિરવાણીયા, નાયબ મામલતદાર રામદેભાઇ, નવલસિંહ, મીરાબેન, મનીષ રાઠોડ, કેશુ ઓડેદરા સહિત નો સ્ટાફ અને અધિકારીઓ ચૂંટણી કામગીરીમાં ઓતપ્રોત જોવા મળ્યા.

મતદાર જયારે એમ વિચારતો હોય કે ઓય વોય ચૂંટણી એટલે શું ? મતદાનના દિવસે મત આપવાનો અને કામ પૂરું!! પરંતુ અમે પ્રકાશ પાડવા માંગીએ છે કે તટસ્થ અને ન્યાયપૂર્ણ ચૂંટણી યોજાય તે માટે તંત્ર કેટલો ભોગ વેઠે છે. જાણે કે આ બધાજ માણસ ન હોતા યંત્રો હોય!! માર્ગો પર પોલીસ જવાન, હંગામી ચોકીઓ પર ફ્લાઇંગ સ્કવોડ અને તેની ટીમ, ઓફિસોમાં અધિકારીઓ અને કર્મચારીઓ, આ બધા જ તનતોડ મહેનત કરે છે ત્યારે જ મતદાર નિર્ભિક પણે મતદાન કરી શકે છે, શહેરો અને ગ્રામ્ય શહેરોમાં પોલીસ ફૂટ પેટ્રોલિંગમાં ખુદ જિલ્લા પોલીસ વડા, નાયબ પોલીસ વડા, વિસ્તારોના ડિવાયએસપી, ડિવિઝનોના પોલીસ ઇન્સ્પેક્ટરો, સ્ટેશનોના પોલીસ સબ ઇન્સ્પેક્ટરો અને કોન્સ્ટેબલોની આખી ફોજ દરેક મતદારને અહેસાસ કરાવે છે કે નિર્ભીકપણે મતદાન કરજો, જેને ફાવે તેને મત આપજો, જેવી ગમતી હોય તેવી સરકાર ચૂંટજો તંત્ર તરીકે અમે તમારી સેવામા તૈનાત છીએ.

પોરબંદરના જ સેવાસદનમાં ટીમે જયારે ત્રીજા મજલે પ્રવેશ કર્યો તો DEMC & MCMC અને cVIGIL ના હેલ્પ સેન્ટરો કાર્યરત જોવા મળ્યા, આ એ સ્થાનો છે જ્યાં ચૂંટણીની કામગીરીને લગતી માહિતીઓ દરેકને આપવામાં આવે છે, જોકે મતદાર તરીકે આવા સેન્ટરો પાસેથી માહિતી મેળવવામાં જનતાને અગવડ ન પડે તેથી લોકપ્રહરી એવા પત્રકારો સેકન્ડે સેકન્ડની માહિતી એકત્ર કરતા હોય છે અને પોતાના પબ્લિકેશન માધ્યમથી માહિતી જનતા સમક્ષ પ્રસિદ્ધ કરતા હોય છે.

ચૂંટણીની કામગીરીમાં વહીવટીતંત્ર એ ચુનિંદા સૈનિકોની પસંદગી કરી હોય છે, આવી ટીમ પસંદ કરવામાં જવાબદારી ન નિભાવવા અને માત્ર મોજશોખ માટે નોકરી કરતાં, લાપરવાહ, બેજવાબદાર કે બહાના કાઢીને આલા અધિકારીઓને સમજાવી લેતા હોય તેવા કર્મચારીઓ ચુનિંદા સૈનિક તરીકે પસંદગી નથી પામતા. આ સિવાય ટીમ બહાર કેટલાંક એવા કર્મચારીઓને પણ પસંદ કરવામાં નથી આવતા જેઓ જેતે વિભાગનું કામ નિષ્ઠા અને ઈમાનદારીથી કરતાં હોય છે.

મતદારોએ આ જાણવું આવશ્યક છે કે પોતે જયારે એકદિવસ મત આપવા લાઈનમાં ઉભા રહેવામાં ત્રસ્ત થઈ જાય છે ત્યારે ચૂંટણી કામગીરીમાં રોકાયેલા અધિકારીઓ અને કર્મચારીઓ ચૂંટણી દરમ્યાન રોજ લાઈનમાં અને ખડેપગે ઉભતા હોય છે, જયારે આવી ટીમ ફરજ દરમ્યાન ચા-નાસ્તો કે ભોજન લેતા હોય છે ત્યારે તેઓ હળીમળીને તેમજ મતદારોને લાઈનમાં વધુ ઉભવું ન પડે તેના આયોજન અને પ્લાનિંગમાં સતત લાઈનમાં ઉભીને કષ્ટ વેઠે છે.

ટીમ જયારે પરત ફરી રહી હતી ત્યારે પહેલા માળની લોબીમાં જિલ્લા ચૂંટણી અધિકારી મળી ગયા, ‘સાહેબ એક મીનીટ’ એવો સાદ કરતાં જ સાહેબે સસ્માઇલ ટીમ તરફ જોયું અને કહ્યું ફરમાવો. જોકે ટીમની કોઈ ફરમાઈશ ન હતી તેથી પૂછ્યું કે સાહેબ બપોરે જમ્યા છો કે કેમ ? તો જવાબ મળ્યો, ના!! પણ હવે રાત્રે જમીશું, કોઈ કામ હોય તો ફરમાવો અન્યથા તમારી સાથે જે સમય વિતાવીશ એનાથી ત્રણ ગણો સમય સ્ટાફે વિતાવવો પડશે. અને ટીમે પરવાનગી લીધી કે ના અમારી કોઈ ફરમાઈશ પણ નથી અને હાલ કોઈ કામ પણ નથી. અમે અને અમારો કેમેરો તંત્રની કામગીરી જનતાની નજરે ચડે તેવા હેતુસર આવ્યા હતાં અને હવે જઈએ છે ત્યારે આપને મળવાનું સૌભાગ્ય થયું એટલું પૂરતું છે. જતાં જતાં સાહેબે કહ્યું કે લોકો વધુમાં વધુ મતદાન કરે અને મતદાર નિર્ભીકપણે મતદાન કરે એ તરફ મતદારોને વધુમાં વધુ માહિતી પહોંચાડજો, હો!! ટીમે કોલ આપ્યો, જરૂર!!