બાબરી ધ્વંસ કેસ: અડવાણી, જોશી અને ઉમાને નિર્દોષ જાહેર કરવા સામેની અરજી ફગાવી

🔊 इस खबर को सुनें

Bhargav Joshi

અલાહાબાદ હાઈકોર્ટની લખનઉ બેન્ચે બુધવારે એક મોટો નિર્ણય આપતાં ભાજપના વરિષ્ઠ નેતા લાલકૃષ્ણ અડવાણી, મુરલી મનોહર જોશી અને ઉમા ભારતી સહિત બાબરી ધ્વંસ મામલે આરોપી 32 નેતાઓને નિર્દોષ જાહેર કરવા સામે દાખલ કરવામાં આવેલી અરજીને ફગાવી દીધી હતી.

જસ્ટિસ રમેશ સિંહા અને સરોજ યાદવની અધ્યક્ષતાવાળી બેન્ચે અયોધ્યાના રહેવાસી હાજી મહમૂદ અહેમદ અને સૈયદ અખલાક અહેમદની અરજીઓ ફગાવી દીધી હતી. અરજીમાં બાબરી ધ્વંસના આરોપી ભાજપના વરિષ્ઠ નેતા લાલ કૃષ્ણ અડવાણી, મુરલી મનોહર જોશી, ઉમા ભારતી, વિનય કટિયાર, બ્રિજમોહન શરણ સિંહ, રાજ્યના પૂર્વ મુખ્યમંત્રી સ્વર્ગીય કલ્યાણ સિંહ અને સાધ્વી ઋતંબરા સહિત 32 નેતાઓને નિર્દોષ છોડી મૂકવાના નિર્ણયને પડકારવામાં આવ્યો હતો.

રાજ્ય સરકાર અને સીબીઆઈએ કહ્યું કે બંને અપીલકર્તાઓ ન તો પીડિત છે કે ન તો આ કેસમાં પ્રારંભિક ફરિયાદી છે. આથી તેમની અરજીને મંજૂરી આપી શકાય નહીં. અરજી પર બંને પક્ષોની દલીલો સાંભળ્યા બાદ કોર્ટે નિર્ણય અનામત રાખ્યો હતો.

6 ડિસેમ્બર 1992ના રોજ અયોધ્યામાં બાબરીનું માળખું તોડી પાડવામાં આવ્યું હતું. આ સંદર્ભમાં, 30 સપ્ટેમ્બર 2020 ના રોજ આવેલા નિર્ણયમાં લખનઉની વિશેષ અદાલતે તમામ આરોપીઓને નિર્દોષ જાહેર કર્યા હતા. ટ્રાયલ કોર્ટે ન્યૂઝ પેપર કટિંગ અને વીડિયો ક્લિપિંગને પુરાવા તરીકે સ્વીકારવાનો ઇનકાર કરી દીધો હતો.