સોશિયલ મીડિયાને કોઈપણ વ્યક્તિ ભલે સારુ-ખરાબ કહેતું હોય પણ ક્યારેક એવી ઘટના બની જાય છે કે તેનાથી કોઈનો જીવ પણ બચી શકે છે. ત્યારે એક આશ્ચર્યજનક ઘટના સામે આવી છે. અમેરિકામાં બેઠેલી ઈન્સ્ટાગ્રામની ટીમે સોશિયલ મીડિયા દ્વારા ભોપાલમાં બેઠેલી એક યુવતીને આત્મહત્યા કરવાથી બચાવી હતી. યુવતીએ ઈન્ટાગ્રામ પર આત્મહત્યાનો પ્રયાસ કરતો વીડિયો શેર કર્યો હતો, જે ઈન્ટાગ્રામની ટીમની નજરમાં આવ્યો અને ટીમે તુરંત મધ્યપ્રદેશની રાજ્ય સાયબર પોલીસને સુચના આપી દીધી. આ સૂચના મળતાં જ સાઈબર પોલીસ પણ તુરંત સ્થળ પર પહોંચી યુવતીને આત્મહત્યા કરતા રોકી લીધી હતી.
યુવતીએ આત્મહત્યાના પ્રયાસના બે અલગ-અલગ વીડિયો શેર કર્યા
આ આશ્ચર્યજનક ઘટના મધ્યપ્રદેશના સતના જિલ્લાના મૈહરની છે. અહીં રહેતી યુવતી કોઈ બાબતે પરેશાન હતી. આ યુવતીએ તેના ઈન્ટાગ્રામ આઈડી પર બે અલગ-અલગ આત્મહત્યા કરવાના પ્રયાસના વીડિયો અપલોડ કર્યા હતા. એક વીડિયોમાં યુવતી પોતાના જ હાથની નસ કાપવાનો પ્રયાસ કરતી જોવા મળી છે તો બીજા વીડિયોમાં ઝેરની પડીકી સાથે નજર આવે છે. આ વીડિયો જેવો જ ઈન્ટાગ્રામની ટીમ સામે આવ્યો તો આ ટીમે તુરંત મધ્યપ્રદેશના રાજ્ય સાયબર પોલીસ હેડ ક્વાર્ટરનો સંપર્ક કર્યો. ટીમે યુવતીની ઈન્સ્ટાગ્રામ આઈડી રાજ્ય સાયબર પોલીસને આપી. સાયબર પોલીસે આઈડીને ટ્રેસ કરી અને સતના પોલીસને તુરંત સ્થળ પર મોકલ્યા અને પોલીસે યુવતીની જીંદગી બચાવી લીધી.
70 મિનિટ સુધી ચાલ્યો ‘ઓપરેશન જિંદગી’
રાજ્ય સાયબર પોલીસના એડિશનલ એસપી વૈભવ શ્રીવાસ્તવે જાણકારી આપી કે, અમેરિકા સ્થિત ઈન્સ્ટાગ્રામની ટીમે અમને સાંજે 5.5 કલાકે ઈ-મેલથી જાણકારી આપતા કહ્યું કે, મધ્યપ્રદેશમાં એક યુવતીએ પોતાના ઈન્સ્ટાગ્રામ આઈડી પર આત્મહત્યાનો પ્રયાસ કરતા કેટલાક વીડિયો અપલોડ કર્યા છે. આ માહિતી મળતાં જ અમે તાત્કાલીક ટેકનોલોજીની મદદથી ઈન્સ્ટાગ્રામની આઈડી ટ્રેસ કરી અને લોકેશનની માહિતી મેળવી. પોલીસને માત્ર મધ્યપ્રદેશમાં કોઈક લોકેશન પર યુવતી હોવાની જાણકારી મળી હતી. જોકે સાયબર પોલીસે સતત સાંજે 6.00 વાગ્યા સુધીમાં લોકેશન ટ્રેસ કરી લીધું હતું. આ લોકેશન ટ્રેસ કરતા જ યુવતી સતનાના મૈહરની હોવાનું સામે આવ્યું. સતના પોલીસે 15 મિનિટની અંદર યુવતીના ઘરે પહોંચી અને યુવતીને આત્મહત્યા કરતા બચાવી લીધી હતી.