ખંભાળિયા તાલુકાના નાના એવા ભાડથર ગામે ગઈકાલે બપોરે નડતરરૂપ મનાતી કેબિન (દુકાન) ખસેડવા બાબતે ગઢવી પરિવારના શખ્સો કેબીન ધારક આહિર આસામીઓ પર જીવલેણ હથિયારો સાથે તૂટી પડ્યાં હતા. આ બધડાટીમાં આરોપી જૂથ દ્વારા કરવામાં આવેલા ફાયરિંગ દરમિયાન બે યુવાનો ગંભીર રીતે ઘવાયા હતા. જ્યારે અન્ય કેટલાક વ્યક્તિઓને પણ નાની-મોટી ઈજાઓ થવા પામી હતી. આ સમગ્ર ઘર્ષણનો વિડીયો સોશિયલ મીડિયા પર પણ વાયરલ થયો હતો. પોલીસને જાણ કરવામાં આવતા પોલીસ કાફલો ઘટના સ્થળે દોડી ગયો હતો.
કેબિન નડતરરૂપ ગણાવી હટાવી લેવા જણાવ્યું
આ સમગ્ર પ્રકરણની પોલીસ સૂત્રો દ્વારા જાણવા મળતી વિગત મુજબ, ખંભાળિયા-પોરબંદર રોડ ઉપર આવેલા મહત્ત્વના એવા ભાડથરમાં કુલ આશરે 12 હજારની વસ્તી પૈકી 400 જેટલા લોકો આહિર પરિવારના વસવાટ કરે છે. સાથે ગઢવી, ભરવાડ વગેરે જ્ઞાતિના લોકો પણ રહે છે. ભાડથર ગામે રહેતા અને ચા પાણીની દુકાન (કેબિન) ધરાવતા કિશન વેજા કેસરિયા નામના એક આસામીની કેબિનને નડતરરૂપ જણાવી, આ જ ગામના પ્રતાપ રાણસુર ગઢવી નામના શખ્સ દ્વારા છેલ્લા બે દિવસથી તેમની આ કેબિન (દુકાન) ખસેડી લેવાનું કહી, બોલાચાલી કરવામાં આવતી હતી. ઉપરોક્ત કેબીન રોડની સાઈડમાં પીડબ્લ્યુડીની જગ્યામાં આવેલી હોઈ આ કેબિનની પાછળના ભાગે ભાડથર ગામના રહીશ રાણસુર ગઢવીએ આશરે 6 વર્ષ પહેલા જગ્યા લીધી હતી. જેમાં પ્લોટિંગ કરતા ઉપરોક્ત કેબિનને તેઓએ નડતરરૂપ ગણાવી કેબિન હટાવી લેવા જણાવ્યું હતું.
મારક હથિયારો વડે સ્કોર્પિયો તેમજ ટ્રેક્ટરમાં ટોળા સ્વરૂપે ધસી આવ્યાં
આ પછી ગઈકાલે બપોરે આશરે સવા બે વાગ્યે કિશન વેજા કેસરિયાની કેબિન પાસે જેસીબી લઈને આવેલા રાણસુર ગઢવી, પ્રતાપ રાણસુર ગઢવી, ભોલા રાણસુર ગઢવી, આશા અજુ ગઢવી તેમજ ભારા ખીમા ગઢવી, હરી નાથા રૂડાચ, દેવીયા આલા ગઢવી, વિરમ હરદાસ, સામરા નથુ, ઈશ્વર વેજાણંદ, જીવા વેજાણંદ, કાના કરમણ, મુન્ના ભોજા, ભોજા રાણા, શિવદાન હરદાસ અને વેજાણંદ વીરપાળ નામના કુલ 17 જેટલા શખ્સો આ સ્થળે ધસી આવ્યા હતા. જે પૈકી રાણસુરના હાથમાં કુહાડી, પ્રતાપના હાથમાં 12 બોરની બંદૂક તેમજ તેમના ભાઈ ભોલા રાણસુરના હાથમાં બંદૂક તથા અન્ય શખ્સોના હાથમાં લોખંડની ટી, લાકડાના ધોકા વગેરે જેવા મારક હથિયારો સાથે સ્કોર્પિયો કાર તેમજ ટ્રેક્ટર જેવા વાહનોમાં ટોળા સ્વરૂપે ધસી આવ્યાં હતા.
તમારું ઢીમ ઢાળી નાંખવા માટે અમે બધા આવ્યા છીએ
આ શખ્સોએ જે.સી.બી. વડે કિશન વેજાની દુકાન તોડતા કિશનની સાથે રહેલા સાહેદ મેરામણ કેસરિયા, ભીમશી જીવા, મયુર જીવા વગેરેએ જણાવ્યું હતું કે “આ મારી કેબિન પી.ડબ્લ્યુ.ડી.ની જગ્યામાં છે. તમારી માલિકીની જગ્યામાં ક્યાં છે. તેમ કહેતા ઉશ્કેરાયેલા આરોપી શખ્સે આ કેબિનની પાછળ આવેલી જમીન અમે કરોડ રૂપિયામાં લીધી છે. તારી કેબિન તો અહીંયા રહેવા નથી દેવી. તમે બધા અહીંથી જતા રહો નહિતર આ બંદૂકો, હથિયારો વડે તમારું ઢીમ ઢાળી નાંખવા માટે અમે બધા આવ્યા છીએ”.
સમજાવટ ચાલતી હતીને ટોળું એકા એક તુટી પડ્યું
આ બનાવ બનતા આ સ્થળે લોકોના ટોળા એકત્ર થઈ ગયા હતા અને કેબીનધારક કિશન સમજાવટના પ્રયાસો કરતા ઉશ્કેરાયેલા પ્રતાપ ગઢવીએ કિશન પર ફાયરિંગ કરી દેતા તે ઘટના સ્થળે જ ઢળી પડ્યો હતો. જ્યારે બીજો ભડાકો દેવાત કેશરિયા ઉપર કરવામાં આવ્યો હતો. ત્યારબાદ આરોપી શખ્સો ફરિયાદી પરિવારજનો પર તૂટી પડ્યા હતા. જેથી થોડો સમય ભારે નાશભાગ થઈ ગઈ હતી. આ ડખ્ખામાં 21 વર્ષીય વિદ્યાર્થી યુવાન રામા શીવા કેસરિયા પર પણ હુમલો કરવામાં આવ્યો હતો. આમ, આ ફાયરિંગ તેમજ બઘડાટીમાં ગંભીર રીતે ઘવાયેલા કિશન વેજા કેસરિયા તથા દેવાત મેરામણ કેસરિયાની હાલત વધુ નાજુક હોવાથી તેમને વધુ સારવાર અર્થે રાજકોટની હોસ્પિટલમાં ખસેડવામાં આવ્યા છે. જ્યારે જગા, ભીખા અને મયુર વગેરેને પણ નાની-મોટી ઈજાઓ સાથે અહીંની ખાનગી હોસ્પિટલમાં સારવાર આપવામાં આવી હતી.
પોલીસે કુલ 17 શખ્સો સામે હત્યાના પ્રયાસની ઢગલો કલમ લગાવી
આ બનાવ બનતા ભાડથરમાં આ વિસ્તારની દુકાનનો ટપોટપ બંધ થઈ ગઈ હતી અને પોલીસને જાણ કરવામાં આવતા પોલીસ કાફલો ઘટના સ્થળે દોડી ગયો હતો. અહીં પરિસ્થિતિ વણસે નહીં તે માટે ગામમાં સજ્જડ પોલીસ બંદોબસ્ત ગોઠવી દેવામાં આવ્યો હતો. આ બનાવ પછી ખાસ બંદોબસ્તમાં રહેલા ડીવાયએસપી હિરેન્દ્ર ચૌધરી તેમજ પી.આઈ. જુડાલ સહિતના સ્ટાફ દ્વારા તાકીદે ઘટના સ્થળે પહોંચી જઈ જરૂરી કાર્યવાહી કરવામાં આવી હતી. આ પ્રકરણ અંગે રામ શીવા કેસરિયાની ફરિયાદ પરથી પોલીસે કુલ 17 શખ્સો સામે હત્યાના પ્રયાસની કલમ 307 તેમજ આઈ.પી.સી. કલમ 326, 325, 324, 323, 504, 506 (2), 427 તથા રાયટીંગની કલમ 143, 147, 148, 149, 120 (બી) તથા આર્મ્સ એક્ટ અને જી.પી. એક્ટ મુજબ ગુનો નોંધ્યો છે. ફાયરિંગની ઘટનાએ નાના એવા ભાડથર ગામ સાથે સમગ્ર પંથકમાં ભારે ચકચાર પ્રસરાવી દીધી છે.
જૂથ અથડામણનો વિડીયો સોશિયલ મીડિયામાં વાયરલ
ભાડથર ગામે આહીર તથા ગઢવી પરિવાર વચ્ચે થયેલા આ ઘર્ષણનો વિડીયો સોશિયલ મીડિયા પર પણ વાયરલ થયો હતો. બઘડાટીના આ બનાવમાં પરિસ્થિતિ વધુ વણસે નહીં તે માટે ભાડથર તથા આસપાસના ગામોમાં મજબૂત પોલીસ બંદોબસ્ત ગોઠવી દેવામાં આવ્યો હતો. જે માટે એલસીબી, એસઓજી તથા સ્થાનિક પોલીસે ચુસ્ત બંદોબસ્ત વ્યવસ્થા હાથ ધરી છે.